ହିତାଧିକାରୀଙ୍କ ମୁହଁରେ ହସ ଆଣିଲେ ଧର୍ମଶାଳା ବିଧାୟକ ହିମାଂଶୁ

ଯାଜପୁର: ଧର୍ମଶାଳା ନିର୍ବାଚନମଣ୍ଡଳୀ ଅନ୍ତର୍ଗତ ଜାରକାସ୍ଥିତ ଧର୍ମଶାଳା ମହୋତ୍ସବ ପଡିଆରେ ଆଜି ଅପରାହ୍ନରେ ଭତା, ରାସନ କାର୍ଡ ଓ ଜମି ପଟ୍ଟା ବଂଟନ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି କାର୍ଯ୍ୟକ୍ରମରେ ଧର୍ମଶାଳା ବିଧାୟକ ହିମାଂଶୁ ଶେଖର ସାହୁ ମୁଖ୍ୟ ଅତିଥି ଭାବେ ଯୋଗଦେଇ ହିତାଧିକାରୀମାନଙ୍କୁ ଭତା, ରାସନ କାର୍ଡ ଓ ଭୁମିହିନମାନଙ୍କୁ ଜମି ପଟ୍ଟା ବଂଟନ କରିଥିଲେ। ଧର୍ମଶାଳା ବିଡିଓ ଜ୍ୟୋତିର୍ମୟ କରଙ୍କ ସଭାପତିତ୍ୱରେ ଆୟୋଜିତ ସଭାରେ ରସୁଲପୁର ବିଡିଓ ସତ୍ୟାନନ୍ଦ ଦାସ, ଧର୍ମଶାଳା ତହସିଲଦାର ସମୀର ରଞ୍ଜନ ଦାସ ଓ ସାଂସଦ ପ୍ରତିନିଧି କାହ୍ନୁ ଚରଣ ଦାସ ପ୍ରମୁଖ ଉପସ୍ଥିତ ଥିଲେ। କାର୍ଯ୍ୟକ୍ରମରେ ଧର୍ମଶାଳା ବ୍ଲକର ୩୨୬ ଜଣଙ୍କୁ ଭତା, ୨୨୯ ଜଣ ଭୁମିହିନଙ୍କୁ ଜମି ପଟ୍ଟା ଓ ୫୩୬ ଜଣଙ୍କୁ ରାସନ କାର୍ଡ ବଂଟନ କରାଯାଇଥିଲା। ସେହିପରି ରସୁଲପୁର ବ୍ଲକର ୮୧ ଜଣଙ୍କୁ ଭତା, ୩୯ ଜଣ ଭୁମିହିନଙ୍କୁ ଜମି ପଟ୍ଟା ଓ ୮୨ ଜଣଙ୍କୁ ରାସନ କାର୍ଡ ଦିଆଯାଇଥିଲା। ଏହି ଅବସରରେ ବିଧାୟକ ଶ୍ରୀ ସାହୁ କହିଥିଲେ ଯେ, ଧର୍ମଶାଳା ନିର୍ବାଚନମଣ୍ଡଳୀରେ ଦାରିଦ୍ର୍ୟ ସୀମାରେଖା ତଳେ ବସୋବାସ କରୁଥିବା ସମସ୍ତଙ୍କୁ ପର୍ଯ୍ୟାୟକ୍ରମେ ରାସନ କାର୍ଡ, ଭୁମିହିନମାନଙ୍କୁ ଜମି ପଟ୍ଟା ଓ ଯୋଗ୍ୟ ହିତାଧିକାରୀଙ୍କୁ ଭତା ପ୍ରଦାନ କରାଯିବ। କାର୍ଯ୍ୟକ୍ରମକୁ ରାଜେଶ ପାଳ, ଦେବରାଜ ମିଶ୍ର, ଜିତେନ୍ଦ୍ର ରାଉତ, ଅଭିଶେକ ରାଉତ, ତପନ ମାହୁନ୍ତ, ତୀର୍ଥରାଜ ପଣ୍ଡା ଓ ସିବୁଲି ଧିର ପ୍ରମୁଖ ପରିଚାଳନା କରିଥିଲେ। ଶହ ଶହ ସଂଖ୍ୟାରେ ହିତାଧିକାରୀ ଓ ସାଧାରଣ ଲୋକ ଯୋଗଦେଇଥିବା ଏହି କାର୍ଯ୍ୟକ୍ରମରେ ପଞ୍ଚାୟତ ସମିତି ସଦସ୍ୟ, ସରପଞ୍ଚ ଓ ଜିଆରଏସମାନେ ମଧ୍ୟ ସକ୍ରିୟ ଭୂମିକା ନେଇଥିଲେ।